Selkie ‒ (Datblygu llwybr masnacheiddio symlach ar gyfer y diwydiant Ynni Môr Cynaliadwy)

Gallai'r tonnau a'r llanw o amgylch Iwerddon a Chymru ddarparu llawer iawn o ynni carbon isel. Mae cwmnïau lleol sy'n adeiladu dyfeisiau i harneisio'r adnodd naturiol hwn yn creu swyddi ac yn allforio i bedwar ban byd eisoes. Fodd bynnag, un o'r rhwystrau sy'n llesteirio datblygiad yn y maes yw diffyg cyllid ar gyfer gwaith ymchwil a datblygu ac ar gyfer treialu  prosiectau arddangos ar y môr. Un o'r rhwystrau eraill yw diffyg gweithdrefnau a chydrannau cyffredin (er enghraifft, angorau gwely'r môr), a'r ffaith bod llawer o gwmnïau technoleg yn gwneud yr un pethau mewn ffyrdd fymryn yn wahanol.



Felly, nodau'r prosiect yw:


1. Sefydlu rhwydwaith trawsffiniol o BBaChau a chwmnïau yn y gadwyn gyflenwi sy'n gweithio ym maes Ynni'r Môr.   


2. Cynnal prosiectau ymchwil a datblygu ar y cyd rhwng y diwydiant a'r byd academaidd;


3. Trosglwyddo gwybodaeth a fydd yn deillio o waith ymchwil a datblygu i randdeiliaid/BBaChau sy'n gweithio yn niwydiant ynni'r tonnau a'r llanw, gan ddatblygu'r sector dechnoleg yn ei gyfanrwydd wrth wneud hynny;  


4. Cynorthwyo BBaChau Iwerddon a Chymru i symud yn eu blaen ar hyd yn llwybr masnacheiddio.